PIZTU! Plentzia, Gorliz eta Lemoizko ezker abertzalearen ahotsa

Hona hemen Plentziako Ezker Abertzaleak Udaletxean aurkeztutako azken idazkiak

LIZENTZIARIK GABEKO ERRADIAZIOAK PLENTZIAN

Joan den uztailaren 17an, hainbat komunikabidetan “LIZENTZIARIK GABEKO ERRADIAZIOAK” izenburua zuen eskutitz bat agertu zen argitaratuta, igorleak Andra Mari bideko eraikuntzan dauden telefono mugikorren antenei buruz idazten zuen.
Bertan agertzen denez, “antena hauek telefono mugikorren erradiazioa ari dira zabaltzen Andra Mari auzoan, alde zaharreko parte handi batean, San Jose auzoan, eta baita inguruetan ere.
Eraikuntza honek ez du funtzionatzeko lizentziarik eta obrarako lizentzia espedientea galdu egin da. Gakoa zera da, lizentzia hauek onartuak izatea guztiz zalantzagarria dela, sospideko arauen arabera erradiazio igorpen hau ilegala izan daitekeelarik.
Udal Batzarrari, auzokide honen baieztapenak zein puntutaraino diren egia azal dezan eskatzen diogu eta guztiok jakinaren gainean jar gaitzaten. Honen inguruan informaziorik euki ezean, dagokion ikerketa irekitzea ezinbestekoa ikusten dugu, delito baten baino gehiagotan erortzeko aukera baitago, osasen publikoaren kontrakoa barne legokeelarik.

erradiazioa.pdf

GUTUNA Silvia López de Guereñu Bernaldori (Lehenengo Alkateordea eta Hirigintzako Zinegotzi Delegatua)

Uztailaren 27ko Osoko Bilkuran zeuk egindako adierazpenak direla eta, zeinetan esaten baitzenuen: “atzo (uztailak 26) prentsan atera zen -gainera, aspaldi ohartarazi diete (Udaletxeko) fatxadan egindako pintaden bitartez- prestatuta zegoen atentatuetako bat (ustez egun batzuk lehenago Bizkaian egindako polizia-operazio batean atxilotuetakoek burututakoa) Plentziako komisarian izango zela”, horiei buruzko jendaurreko zuzenketa egin dezazula eskatu nahi dizugu, izan ere, inolako komunikabidetan, ez ikus-entzunezkoetan ez prentsan, ez da zeuk esandakorik aipatu. Honenbestez, gezurra esaten ari zara horrelako adierazpenak egitean eta hori gutxi balitz, hauei erabilera alderdikoi eta oportunista ematen diezu, komunikabideetan agertutako informazioa gehien komeni zaizun momentuan erabiliz. Larriena kontu honetan, zure adierazpenek eragin dezaketen alarma sozialaz gain, zeuk eman duzun epaia da, epaileek eurena eman baino lehenago, gainera, gaur egun ziurtasunez dakigun bakarra atxilotuen kopurua eta eurek egindako tortura-salaketak direnean.
Amaitzeko, irailaren 30eko Osoko Bilkuran zeuk esandakoa ere kontuan hartu dugu jendaurreko zuzenketa hau eskatzerako orduan. Hauxe esan zenuen bertan, EAJko zinegotzi bati zuzentzen ari zinela (etorkizuneko Haur Eskolaren proiektua aurrera eramateko bere taldeak eskatutako diru-laguntzarekin erlazionatutako berri baten harira, egun horretan bertan prentsan atera zena) : “ez dizut kontatuko kazetariak nolakoak diren, ez dagoelako horren beharrik, denok baitakigu nolakoak diren”.

gutuna-silviari.pdf

Cortaderia Selloana = Belar suntsitzailea

“Cortaderia Selloana” izen ezberdinekin ezagutzen dugun graminia exotikoa da, “cortadera, panpako belarra edo plumeroak”. Belar suntsitzaile honek, Argentina, Uruguay, Txile eta Brasilen du jatorria, eta lorategietan apaingarri gisa erabili eta gero, orain dela hamarkada bat baino gehiago hasi zen espezie suntsitzaile hartzen gure herrialdean.
“Cortaderia” honek mulu (mata) itxura dauka, inguru hezeetan eta klima epeletan zabaltzen da batik bat. Hamar hamabost urte irauten du batez beste, zeinetan haizeak lagunduta, milaka milioi hazi banatu ahal dituen 30 km karratutan.
Bere kimuak taldekatu eta hiru metroko ingurua eta lau metroko altuera izatera hel daitezke, lurrean ia metro bateko sakonerara hel daitezkeelarik. Sustraien indar honek, sute baten ondoren ere berpiztera lagun ditzake; arrazoi hauengatik eta moldatzeko duen ahalmenagatik, oso arin eta erraz zabaldu egiten da.
Bizkaiko ikerketa institutuak 2006. urtean argitaratutako ikerketan azaltzen duen bezala, herrialdean, 134 hektarea inguru hartuta daude, 134.000 landare 1.336 leku desberdinetan sakabanatuta. Eragin maila altua edo oso altua da 24 herrietan, 100 hektareatan.
Eta Plentzia ez da salbuespena: Berreaga, Txipio, Saratxaga, Isuskiza, erreka inguruak… Belar suntsitzaile honek herriaren hainbat parte kutsatu ditu, eta ez bada erremediorik jartzen, horrela jarraitu eta bertako landarediari kalte egingo dio, herri laborantzei, espazio publikoei…
Premiazko eskaera egiten diogu beraz Udaletxeari, behar diren neurriak ezar ditzatela arazo larri hau konpon dezagun, ondorioak, guztiok pairatzen baititugu, eta behin arazoari aurre eginda, horrelakoak berriro ez gertatzeko beharrezko neurriak har daitezen.

cortaderia-selloana.pdf

GUZTION PARTE HARTZEA EZINBESTEKOA DA!

Amnistiaren Aldeko Mugimenduaren aurkako auzian epaituak izan direnek sententzia jasoko dute bihar, asteazkenean, entzutegi nazionalean. AAMak kalean erantzuteko deia luzatu du eta sententzia honi erantzuteko mobilizazioak burutuko dira hainbat herritan datorren asteazkenean.
BIHAR, ASTEAZKENA, ILUNTZEKO 20:30etan ENKARTELADA EGINGO DA PLENTZIAKO “PIRULIN”!
ASKI DA! EUSKAL HERRIAK ASKATASUNA BEHAR DU!

Irabazlearen zain gaude!!!! Zu bazara, idatzi helbide elektroniko honetara: piztupgl@euskalerria.org

Plentziako Presoen Lagunak taldetik eskerrak eman nahi dizkiogu Elkartasun Zozketa honetan parte hartu duen jende orori, eta euskal preso politiko zein errepresaliatuei elkartasuna adierazten jarraitzeko deia egin dute.

Abuztuaren 29an, ostirala, arratsaldeko 16:00etan ENKARTELADA egingo da Kristo Baselizan, “EUSKAL PRESOAK EUSKAL HERRIRA” lelopean.
Abuztuaren 31ean, igandea, 13:00etan ENKARTELADA burutuko da Astilleron, “EUSKAL HERRIAN DEMOKRAZIA ZERO” lelopean. Arratsaldeko 15:00etan herri bazkaria egingo da Txosnan (bazkarirako txartelak salgai daude ohiko lekuan). Bazkal ostean omenaldia egingo zaie Euskal Preso Politikoei.
Irailaren 1ean, astelehena, NEKAZAL AZOKA SOLIDARIOA Astillero inguruetan
Iraiaren 2an, 12:00etatik aurrera KOKTELAK Erribera kalean

Jaietan ere, presoak eta iheslariak etxera!

KARTELA pdf-en:
jaiak.pdf

Azken asteotan espainiar gurutzadaren kapitulu berri baten antzezpena ikusten ari gara. Orain, kaleen, enparantzen eta leku publikoen izenak errekonkistatzeko asmo txarrarekin, Euskal Herriko herri eta hiri askotan herritarrek demokratikoki aukeratu dituztenak.
Herri eta hiri desberdinetako (Zornotza, Arrigorriaga, Zizurkil, Hernani, Tolosa, Durango, Leioa eta Etxarri-Aranatz, besteak beste) hautetsiak pairatzen ari diren kriminalizazioagatik eta euren eginkizun-politikoan ematen ari diren ondorio kezkagarriagatik ez balitz, hau guztia antzezlan patetikoa besterik ez dela esango genuke.
Baina, arestian aipatutakoari harrigarria baderitzogu ere, ezin dugu ahaztugaur egun Euskal Herriko txoko askotan oraindik ere ikur frankista ugari daudela. Plentzia ez da salbuespena; horrela, uztarri eta gezi faxistak babes ofizialeko etxebizitzetako plaketan ikus daitezke: Areatza 9, Labasture 6 eta 8 , Mungia Bidea 5, esaterako.
Gainera, Udalak kaleratutako festen liburua ikusi dugunean, “UN SIGLO DE HISTORIA. Cien años de historia a través de los Alcaldes de Plentzia” artikulua hain zuzen ere, honek harrituta utzi eta sutan jarri gaitu. Aparteko argazki erreportaia honetan azken mendean zehar demokratikoki hautatutako alkateak eta erregimen frankistaren aldeko alkateak nahasten dira. Izan ere, betiko gobernadore zibilak hautatutako azken hauek sarritan auzokideen errepresio eta deuseztapenean parte hartu zutela gogorarazi behar dugu.
Plentziako Ezker Abertzalearen ustez, hau dena, gerra zibilean eta gerraostean gorriak ikusi zituzten plentzitarrentzat eta euren familientzat, irain handia da. Hori dela eta, Udalari agindu nahi diogu iraina konpontzeko, hau da: festen liburua zirkulaziotik kentzea eta akatsak zuzentzea, denon onerako.
Bestalde, gaurtik aurrera diktadura goraipatzen duen sinbologiaren eliminaziorako beharrezko prozedurak abian jartzeko Udalari eskatzen diogu, adibidez, arestian aipatutako alkateen argazkiak Udaletxetik kanpo aterata. Udalbatzak auzokideei informazioa erraztu behar die eta auzokideen komunitateei horrela jokatzeko adorea eman behar die, beharrezko udal baliabideak euren esku jarrita, bai giza baliabideak bai baliabide materialak.
Izan ere, aztarna hauen eliminazioa ez da aurreko udalbatzak ondratuko zukeen ekintza boluntarista. Sinbologia falangista edo frankista kentzea eta erregimen diktatorialarekin lotura izan zuten lagunei merezimendua kentzea exijitu behar da, baita lege espainolak ontzat hartuta ere, (B.O.E. 52/2007 Legea), Udal honek bete onartzen dituenak.
Amaitzeko, esan behar dugun gauza bakarra da Grupo Independientek, festen liburuan agertzen den artikuluarekin, bere benetako itxura politikoa erakusten hasi dela; orain arte
hitz ederren, aitzakia hutsen edo gezurrezko apologiaren atzean ezkutatu izan duena.

TEXTUA pdf-n:

ikur.pdf

Datorren ostegunean, uztailak 17, arratsaldeko 19etan MARKO DEMOKRATIKORAKO PROPOSAMENA aurkeztuko da Plentziako Kultur Etxean (Goñi Portal)